Халқаро Шахмат Академия ҳақида маълумот

Халқаро Шахмат Академияси ҳақида маълумот

 Ўзбекистон Республикаси Вазирлар Маҳкамасининг 2014 йил 20 июндаги № 163 сонли қарорига асосан,Шахмат бўйича республика ихтисослаштирилган болалар-ўсмирлар олимпия заҳиралари спорт мактаби  ташкил этилди. 2018 йил 9-августдаги “Ўзбекистон республикасида шахматни янада ривожлантириш тўғрисидаги ПҚ- 3906 қарорга асосан, шахмат мактаби  Ўзбекистон шахмат федерацияси тасарруфига ўтказилди ва 2019 йил 14 мартдан Халқаро Шахмат Академияси номи билан фаолият юритмоқда.

  Халқаро Шахмат Академиясига асосан шахматга иқтидори кучли ва лаёқатли спортчи-ўқувчилар 6 ёшдан бошлаб имтиҳон асосида қабул қилинади. Халқаро Шахмат Академияси мактабдан ташқари таълим муассасаси ҳисобланиб, иқтидорли ёш шахматчиларни саралаш ва уларни юқори савияда тайёрлаш вазифасини бажаради.

  Халқаро Шахмат Академиясининг вилоятларда малакали тренерлари фаолият олиб борадилар ва ҳудудлардаги энг иқтидорли  ёш шахматчиларни  саралаб борадилар. Халқаро Шахмат Академияси бошқа шахмат клублари, спорт мактаблари ва умумтаълим мактаблари тренерлари ва шахматчи-ўқувчилар учун методик ёрдам бериш, шахмат йўналишида тавсиялар ва қўлланмалар тайёрлаш ва уларни малакасини ошириш каби ишларни йўлга қўяди.  Шахмат бўйича миллий терма жамоаларга юқори даражадаги шахматчилар  тайёрлайди. Бундан ташқари дунёнинг етакчи шахматчилари иштирокида семинарлар ва “мастер класс”лар ташкил этади.

  Шунингдек, Халқаро Шахмат Академиясида ёш шахматчиларнинг психологик, маънавий-маърифий ҳамда умумий жисмоний тайёргарликларига жиддий эътибор қаратилади.

  Замонавий, юқори сифатли ахборот технологияси жиҳозлари билан таъминланган ўқув-машғулот, маъмурий хоналари, спорт зали, ошхона, катта ва кичик ўйин заллари бор. Вилоятлардан келиб ўқув машғулотларига қатнашувчи шахматчи-ўқувчилар ҳамда  хаоқаро турнирларда иштирок этувчилар учун 50 ўринли кенг,шинам меҳмонхона, кўкаламзорлаштирилган манзарали ҳудуд ҳамда 150 ўринли айвон (ёзги мусобақалар зали)  яратилган.

 Ушбу мусобақалар залида шахмат бўйича Жаҳон ва Осиё чемпионатларини юқори савияда ташкил этиш ва ўтказиш учун барча шароитлар мавжуд.

  Халқаро Шахмат Академиясида ҳозирги кунда халқаро гроссмейстерлар, ФИДЕ ва халқаро спорт усталари ҳамда олий тоифали тренерлар фаолият олиб боришади.